أولا مقادير العيش
2 كوب دقيق
كوب ماء دافيء
رشة ملح ورشة فلفل ورشة شطة
معلقة كبيرة خميرة بودر
معلقة كبيرة بيكنج بودر
معلقة كبيرة لبن بودر
فنجان قهوة زيت
الطريقة
نخلط كل المكونات الجافة مع بعض
ونضيف عليهم الماية الدفية واحدة واحدة ونعجن كويس
وبعدين في الاخر نضيف الزيت ونعجن كويس اوي لحد ما
العجينة تبقي معاكي مظبوطة ومش بتلزق
دة شكلها بعد العجن
نغطي العجينة بطبق او ورق تغليف ونسيبها لحد ما تخمر
ودة شكلها بعد ما تخمر
بعد كدة نجيب العجينة وناخد منها قطعة صغيرة
ونفردها علي اي سطح مستوي مرشوش بدقيق
ونحطها في صنية او صاج علي البوتاجاز من فوق
انا حطيتها علي صنية تيفال بالشكل دة
ومش بياخد وقت العيش يادوب تلاقيه احمر من تحت
تقلبيه علي الناحية التانية ويبقي كدة خلاص جاهز
ودة شكله بعد ما جهز
وتكملي باقي كمية العجينة
المقادير اللي انا كاتباها عملت 7 رغيف عيش حجمهم معقول
كدة يكون العيش جاهز
هنجهز الحشوة بتاعتنا واللي هي عبارة عن
مقادير الشاورمة
فراخ مخلية مقطعة شرائح رفيعة او قطع صغيرة
بصلاية صغيرة مقطعة قطع صغيرة
فصين ثوم مقطعين قطع صغيرة
وفيه اضافة ضفتها مع الفراخ وهي مشروم مقطع شرايح بجد بيخلي الطعم جميل اوي
توابل عبارة عن
(ملح,فلفل,شطة,كمون,زعتر,ريحان,جنزبيل بودر)
الطريقة
نجيب صنية ونحط فيها الفراخ والبصل والثوم والتوابل مع حتة زبدة ونقلبهم كويس
ونسيبهم علي نار هادية
ولما تقرب الفراخ علي السوا نضيف لها المشروم
ونضيف شوية ماية ونسيب الشاورمة علي نار هادية لحد ما تستوي كويس
ودة شكلها النهائي
ونجهز بطاطس مقلية وخيار مخلخل للحشو برضهوكمان هنجهز صوص هنحطه علي العيش قبل الشاورما
وهو عبارة عن
لبنة
وادي صورة اللبنة لاي حد مش عارفها وهي تشبه القشطة والزبادي
ولو مش متوفرة عندك ممكن تستبدليها بجبنة سايلة او تستغني عنها خالص
كاتشاب
مايونيز
هوت صوص
ونخلطهم مع بعض كويس
ودة هيكون شكله
نبتدي بقي نجهز الساندوتشات بتاعتنا
هنجيب الرغيف وندهنه بالصوص
ونحط بطاطس ومخلل والشاورما
وتلفي الرغيف
وطبعا انت ممكن تزودي الحشو ولو لقيتيه قليل انا بزود وانا بلف لو حسيت انه قليل
ودة الشكل النهائ للساندوتشات
وممكن تقدميها مع مخلل وبطاطس مقلية
ليست هناك تعليقات:
إرسال تعليق